З 1 верасня бягучага года ў сувязі з рамонтам будзе зачыненая чырвоная сцежка на ўчастку: «Чорны Стаў пад Рысамі – Рысы» ў абодвух напрамках. Пра гэта паведаміў Нацыянальны татранскі парк.
Чакаецца, што рамонтныя работы на папулярным маршруце будуць працягвацца два-тры тыдні. З-за складаных умоваў і надвор'я, якія могуць перашкодзіць у працы, немагчыма дакладна вызначыць дату завяршэння работ, паведаміла кіраўніцтва парку.
Зачыненыя будуць таксама альпінісцкія дарожкі ў раёне Рысаў. Рысы, вышыня якіх складае 2499 метраў над узроўнем мора, гэта найвышэйшая вяршыня ў польскай частцы гораў Татры і ў Польшчы. Гэта памежны пік, і да яго таксама вядзе сцежка са славацкага боку.
PAP/аз