Дадзеныя з рэестра даўжнікоў BIG InfoMonitor паказваюць, што палякі ва ўзросце ад 18 да 24 гадоў маюць запазычанасць больш як на 830 мільёнаў злотых.
Дыяна Баравецка з BIG InfoMonitor кажа, што гэта шмат, але сітуацыя паляпшаецца. «Ацэнка фінансавага становішча маладых палякаў, разгляданая праз прызму іх схільнасці да запазычанасці, выглядае шматабяцальнай, але яна ўсё яшчэ далёкая ад ідэальнай. Пратэрмінаваная запазычанасць, як некрэдытная, так і крэдытная, у гэтай групе знізілася прыблізна на 157 мільёнаў злотых», – дадае яна.
У той жа час усё менш і менш маладых людзей робяць зберажэнні – 32 працэнты з іх не маюць зберажэнняў. Год таму гэты паказчык складаў 22 працэнты.
Маладыя палякі, актыўныя ў інтэрнэце і сацыяльных сетках, недастаткова асцярожныя ў дачыненні да асабістых дадзеных. Дырэктар па бяспецы BIK Group Анджэй Карпінскі падкрэслівае, што яны ўсё часцей становяцца ахвярамі махляроў. У першай палове года было сарвана амаль дзве тысячы спробаў скрасці дадзеныя маладых людзей на суму больш за 17 мільёнаў злотых. Эксперт адзначае, што падчас бесклапотнага прагляду вэб-старонак такія дадзеныя, як нумары PESEL, лагіны, паролі, нумары крэдытных карт, адрасы электроннай пошты і нумары тэлефонаў, звязаныя з імёнамі і прозвішчамі, могуць выйсці з-пад кантролю.
Анджэй Карпінскі тлумачыць, што дадзеныя могуць трапіць на чорны рынак у інтэрнэце або ў даркнет, дзе і адбываецца незаконны гандаль уцечкай дадзеных, у тым ліку са школ, універсітэтаў і лабараторый.
IAR/вх