У гэтым сезоне – дзякуючы прамым рэйсам – «можна адкрыць для сябе менш вядомыя напрамкі, перш чым яны стануць папулярнымі і дарагімі», – гаворыцца на сайце Sky News. «Адразу пасля Каляд мала хто думае пра адпачынак, і таму попыт вельмі нізкі». Вось чаму цэны значна ніжэйшыя. Гэтая тэндэнцыя працягваецца і ў лютым, за выключэннем гарналыжных курортаў.
Зіма – ідэальны час для таннага адпачынку ў горадзе, дзе надвор'е не мае вялікага значэння, бо ёсць музеі, галерэі і рэстараны.
Шон Тыптан з Асацыяцыі брытанскіх турыстычных агентаў і Алан Фрэнч, дырэктар па падарожжах у Thomas Cook, раяць падумаць пра польскія гарады – Кракаў, Вроцлаў, Варшаву. А таксама звярнуць увагу на Прагу і Браціславу. Яны апісалі сталіцу Славакіі як «сапраўды чароўны горад» (і адносна недарагі).
Акрамя таго, эксперты згадалі паўднёвую Італію (асабліва Сіцылію) і Партугалію. «Партугалія сапраўды прыемная. Рэстараны там працуюць дапазна. Аднак падарожнікам варта пазбягаць пляжных курортаў. Лепш ехаць у Порту ці Лісабон», – раіць Алан Фрэнч.
Сярод рэкамендаваных напрамкаў была таксама Грэцыя, дзе «ёсць шмат захапляльных, прыгожых месцаў, якія значна таннейшыя [у параўнанні з Заходняй Еўропай – рэд.], таму што яны не прыцягваюць шмат замежных турыстаў». «Нават у сталіцы, Афінах, можна знайсці выгадныя прапановы ў параўнанні з Лонданам ці Парыжам», – падкрэсліў Шон Тыптан.
Не толькі Еўропа
З больш аддаленых краін, дзе можна правесці адпачынак адносна нядорага (у параўнанні з якасцю паслуг), брытанскія эксперты па падарожжах рэкамендавалі ўключыць Паўночную Афрыку, «ад Туніса, які зноў адкрываецца, да Марока». У Паўднёва-Усходняй Азіі (дзе, аднак, авіябілеты значна даражэйшыя), паводле Тыптана і Фрэнча, варта наведаць Вʼетнам і Лаос, а ў Лацінскай Амерыцы – Аргенціну.
polskieradio24.pl/вх