Пасол ЗША ў Польшчы зноў раскрытыкаваў спікера польскага Сейма Уладзімежа Чажастага (Włodzimierz Czarzasty). «Гэты чалавек — пагроза», — напісаў Том Роўз у сацсетках.
Гэтая рэакцыя амбасадара на інтэрвʼю выданню «Financial Times», у якім Уладзімеж Чажасты крытычна выказаўся пра амерыканскага лідара Дональда Трампа. У размове з журналістам польскі палітык казаў, між іншым, пра «абсалютна ірацыянальныя паводзіны» амерыканскага прэзідэнта, называючы яго «лідарам хаосу».
— Адзінай мэтай яго правакацыйнай рыторыкі, якая абражае прэзідэнта Злучаных Штатаў, можа быць нанясенне шкоды амерыканска-польскім адносінам і аслабленне ўласнай краіны. Магчыма, мы не павінны здзіўляцца, бо гэта вядомы крайне левы апаратчык і былы камуніст, — напісаў амерыканскі пасол на платформе X.
Нагадваем, раней Том Роўз заявіў, што разрывае сувязі са спікерам польскага Сейма пасля абразлівых, паводле яго, выказванняў польскага палітыка пра прэзідэнта Дональда Трампа. Тады амерыканскі амбасадар падкрэсліў, што словы Уладзімежа Чажастага — гэта сурʼёзная перашкода для «выдатных» адносін паміж амерыканскай адміністрацыяй і прэмʼерам Дональдам Тускам і яго ўрадам.
IAR/аз