На Вестэрплатэ будзе пабудаваны падземны музейны павільён, і будзе адноўлена ўсё поле бою. Інвестыцыі таксама ўключаюць планы па аднаўленні некаторых гістарычных будынкаў. Працы будуць выконвацца паэтапна, каб мінімізаваць перашкоды для наведвальнікаў.
Першы фундамент пад музей быў закладзены ў канцы красавіка. Чакаецца, што новая экспазіцыя будзе пабудавана да 2030 года. Эва Лідзбарска-Крэфт, намеснік дырэктара па адміністрацыі і інвестыцыях Музею Другой сусветнай вайны, распавяла PAP, што адной з галоўных мэтаў інвестыцый зʼяўляецца захаванне хаця б частковага доступу да Вестэрплатэ падчас рэвіталізацыі.
— Мы спрабуем мінімізаваць поўнае выключэнне паўвострава з турыстычнага маршруту, а таксама яго выкарыстанне як месца правядзення дзяржаўных цырымоніяў», — адзначыла яна.
Асаблівую праблему будзе ствараць будаўніцтва галоўнага музейнага павільёна плошчай прыблізна 7 тысяч квадратных метраў. Музей будзе цалкам размешчаны пад зямлёй, а мэтай праекту зʼяўляецца паказ сапраўднага поля бою.
Пасля завяршэння рэвіталізацыі тэрыторыя атрымае новы гістарычны наратыў і большую даступнасць для наведвальнікаў.
Паводле ацэнак, Вестэрплатэ ў цяперашні час штогод наведваюць ад некалькіх сотняў тысяч да больш чым мільёна чалавек. Пасля адкрыцця новага музею ўстанова чакае «якаснага, а не чыста колькаснага павелічэння».
— Прыярытэт не ў максімізацыі колькасці наведвальнікаў, а ў кіраванні турызмам на ўстойлівай аснове, — кажуць у музеі. Новая інфраструктура ўпарадкуе турыстычны рух.
PAP/юл