Паводле звестак AP, праз некалькі тыдняў пасля прыпынення ратацыі вайсковых падраздзяленняў у Польшчы і заявы Трампа аб адпраўцы «дадатковых 5 тысяч вайскоўцаў» амерыканскія вайскоўцы ўсё яшчэ не ведаюць, што гэта будзе азначаць на практыцы.
Пакуль разглядаецца рабочы варыянт — накіраваць у Польшчу салдат з падраздзяленняў, якія ўжо размешчаны ў Еўропе, а не перакідваць іх з ЗША, паведаміла AP адна крыніца. Паводле слоў чыноўніка, так вайскоўцы спрабуюць дапасавацца да апошніх заяваў прэзідэнта.
Блытаніна вакол ваеннай прысутнасці ЗША ў Польшчы стала вынікам шэрагу супярэчлівых рашэнняў Белага дома. Спачатку, пасля спрэчкі з канцлерам Германіі Фрыдрыхам Мэрцам з нагоды вайны з Іранам, было абвешчана аб вывадзе 5 тысяч амерыканскіх вайскоўцаў з гэтай краіны. Пентагон пачаў разглядаць магчымасць вываду 2-га кавалерыйскага палка, пастаянна дыслакаванага ў Германіі, але на пачатку мая проста адмяніў запланаваную ратацыю 4 тысяч салдат з 2-й баявой групы бранятанкавай брыгады 1-й кавалерыйскай дывізіі, размешчанай у Форт-Худзе, штат Тэхас, якія павінны былі быць накіраваныя ў Польшчу. Аднак пазней было абвешчана, што ў Польшчу будзе накіравана дадатковых 5 тысяч вайскоўцаў. Агенцтва паведаміла, што Трамп апублікаваў свой пост у той жа дзень, калі ратацыя войскаў была афіцыйна адменена.
Паводле звестак AP, хоць рашэнне было прынята ў пачатку мая, саюзнікі па НАТА даведаліся пра яго толькі ў сярэдзіне мая, і некаторыя салдаты былі праінфармаваныя аб адмене сваёй паездкі ў Польшчу непасрэдна перад выездам. Каля тысячы салдат, якія ўжо размешчаныя ў Польшчы, усё яшчэ чакаюць пацверджання таго, што ім давядзецца вярнуцца ў ЗША. Абсталяванне падраздзялення ўжо было ў дарозе — толькі транспарт каштаваў 32 мільёны долараў, паводле звестак Транспартнага камандавання ЗША (TRANSCOM).
Агенцтва AP паведаміла, што калі Пентагон вырашыць вывесці 2-і кавалерыйскі полк з Германіі, кошт аперацыі складзе некалькі мільярдаў долараў. Гэта звязана з адсутнасцю ў ЗША інфраструктуры, якая магла б змясціць салдат і іх семʼі. Ведамства таксама папярэдзіла, што перамяшчэнне падраздзяленняў з Германіі ў Польшчу таксама можа шмат каштаваць і заняць некалькі гадоў.
ПР/юл