Пажарныя Дзяржаўнай пажарнай службы зафіксавалі ў панядзелак 673 выезды, звязаныя з неспрыяльнымі ўмовамі надвор'я, паведаміў у аўторак PAP старэйшы капітан Войцех Гралец (Wojciech Gralec) са штаба Дзяржаўнай пажарнай службы. Моцны вецер і дождж зрывалі дахі і лініі электраперадачы.
Найбольшая колькасць выездаў адбылася ў Мазавецкім ваяводстве (427), Куяўска-Паморскім ваяводстве (81) і Вялікапольскім ваяводстве (27). Пажарныя Дзяржаўнай пажарнай службы ў Лодзі зафіксавалі 24 выклікі, ва Уроцлаве — 21, у Катавіцах — 18, у Любліне — 17, у Кракаве — 12, у Кельцэ — 11 і ў Ольштыне — 10.
Агульная колькасць выездаў пажарных службаў у панядзелак склала 2039, у тым ліку гэта былі 432 пажары, 1411 іншых мясцовых здарэнняў, а 196 выездаў класіфікавана як ілжывыя трывогі.
Затое, дзякуючы ападкам, нязначна падняўся ўзровень вады ў Вісле. Учора (10 жніўня) на вымяральным пункце "Варшава-Бульвары" быў зафіксаваны рэкордна нізкі ўзровень — 102 сантыметры. Паводле слоў сіноптыка і гідролага Інстытута метэаралогіі і воднай гаспадаркі Дарыюша Віткоўскага (Dariusz Witkowski), з сённяшняга дня чакаецца кароткатэрміновае паляпшэнне.
— Паводле прагнозаў, узровень вады павысіцца на 10-20 сантыметраў. На жаль, гэта не будзе працяглая тэндэнцыя, паколькі ўжо ў чацвер, паводле прагнозаў, вады зноў паступова будзе станавіцца менш.
Да чацвярга (13 жніўня) узровень вады на станцыі Варшава можа дасягнуць 115 сантыметраў. Для параўнання, узровень трывогі на гэтай станцыі складае 750 сантыметраў.
IAR/нг