З-за актыўнасці расійскіх беспілотных лятальных апаратаў (БПЛА), якія наносяць удары па тэрыторыі Украіны, у паветранай прасторы Польшчы была праведзена аперацыя ваеннай авіяцыі, паведаміла ў нядзелю Аператыўнае камандаванне Узброеных сіл Польшчы.
У адпаведнасці з дзеючымі працэдурамі праз Цэнтр паветраных аперацый Камандаванне паветранага кампанента актывавала неабходныя сілы і рэсурсы, якія ёсць у яго распараджэнні. Наземныя сістэмы супрацьпаветранай абароны і радыёлакацыйнай разведкі былі прыведзеныя ў стан гатоўнасці.
Аперацыя мела прафілактычны характар і была накіравана на абарону паветранай прасторы, асабліва ў раёнах, прылеглых да мяжы з Украінай.
Аператыўнае камандаванне Узброеных сіл Польшчы сочыць за бягучай сітуацыяй, а падпарадкаваныя сілы і рэсурсы застаюцца гатовымі да неадкладнага рэагавання.
А 6-ай раніцы ўрадавы цэнтр праінфармаваў пра адмену трывогі аб пагрозе паветранага ўдару. Адначасова Урадавы цэнтр бяспекі заклікаў насельніцтва сачыць за камунікацыямі. Тэкставыя паведамленні з гэтымі папярэджаннямі былі разасланыя жыхарам Уладаўскага, Ленчынскага, Свідніцкага, Хелмскага і Красныстаўскага паветаў Люблінскага ваяводства. Як паведамлялі слухачы «Радыё Люблін», у гэтых паветах таксама былі ўключаны сірэны. У некаторых раёнах гукавая сігналізацыя гучала двойчы.
PAP/ПР/юл