Польшча не падтрымлівае запрашэнне Пуціна на G20, але прэзідэнт Наўроцкі паляціць у Маямі

«Нам гэта не падабаецца. Калі б гэта залежала ад нас, Расія павінна была б быць ізаляваная на ўсіх міжнародных форумах».

Прэзідэнт Польшчы Караль Наўроцкі

Фота: PAP/Marcin Obara

Польшча негатыўна ставіцца да запрашэння расійскага дыктара Уладзіміра Пуціна на снежаньскі саміт G20 у ЗША, аднак прэзідэнт Караль Наўроцкі не плануе адмаўляцца ад удзелу. Пра гэта заявіў кіраўнік Бюро міжнароднай палітыкі пры прэзідэнце Польшчы Марцін Пшыдач.

«Нам гэта не падабаецца. Калі б гэта залежала ад нас, Расія павінна была б быць ізаляваная на ўсіх міжнародных форумах», — сказаў Пшыдач.

Паводле Пшыдача, удзел Караля Наўроцкага ў саміце адпавядае інтарэсам Польшчы. «Прэзідэнт збіраецца ў Маямі і на гэтым этапе не мае намеру мяняць планы», — падкрэсліў Пшыдач, удаклданіўшы таксама, што не чакае кантактаў паміж Наўроцкім і Пуціным.

Раней дзяржсакратар ЗША Марка Рубіа паведаміў, што Вашынгтон запрасіў Пуціна на саміт G20, які пройдзе 14–15 снежня ў Маямі. Паводле амерыканскага дыпламата, сустрэча можа даць расійскаму кіраўніку магчымасць паразмаўляць з Дональдам Трампам і іншымі сусветнымі лідарамі.

pap/эж