Расійская пракуратура патрабуе 15 гадоў зняволення для гісторыка «Мемарыялу» Юрыя Дзмітрыева. Даследчыка сталінскіх злачынстваў вінавацяць у сексуальным дамагальніцтве да прыёмнай дачкі. Паплечнікі гісторыка называюць дзеянні праваахоўных органаў правакацыяй і палітычнай помстай. Аналагічныя меркаванні і ў расійскіх актывістаў «Мемарыялу» і іншых арганізацый абароны правоў чалавека.
На думку незалежных гісторыкаў, Юрый Дзмітрыеў паставіў сябе пад пагрозу пераследу з боку службаў бяспекі, раскрыўшы месцы пахаванняў ахвяр сталінскіх злачынстваў. Дзякуючы яго даследаванням, сярод іншых, у Сандармоху і Красным Боры ў Рэспубліцы Карэлія былі выяўлены масавыя пахаванні.
Кіраўнік Карэльскага «Мемарыялу» быў арыштаваны ў 2016 годзе. Праз два гады суд апраўдаў мужчыну. Аднак у тым жа годзе Вярхоўны суд Карэліі адмяніў прысуд і вярнуў справу на разгляд.
Сёння юрысты Юрыя Дзмітрыева выступяць з апошнімі прамовамі. Раней пракурор запатрабаваў ад яго 15-гадовага прысуду.
яс