У раёне аэрапорта Унукава ў Маскве, куды апазіцыянер Аляксей Навальны павінен прыляцець з Германіі ў нядзелю ўвечары, можна ўбачыць паліцэйскія машыны; перад тэрміналам была пастаўлена металічная агароджа.
У Санкт-Пецярбургу паліцыя затрымала прыхільнікаў Навальнага. Яны збіраліся ехаць у Маскву цягніком, каб вечарам прывітаць актывіста апазіцыі па вяртанні ў краіну.
Пецярбургскі партал «Фантанка» паведаміў, што з-за прыбыцця Навальнага сілавыя структуры ў асноўных гарадах Расіі знаходзяцца ў стане павышанай гатоўнасці. У нядзелю працуюць супрацоўнікі дэпартаментаў Міністэрства ўнутраных спраў і Федэральнай службы бяспекі (ФСБ) па барацьбе з экстрэмізмам, а таксама падраздзяленні Расгвардыі.
Аднак, праваахоўным органам было прадпісана дзейнічаць агрэсіўна толькі пры неабходнасці, каб пазбегнуць ахвяр, якія могуць стаць сімвалам, паведамляе «Фантанка».
Паплечнікі Навальнага заклікалі яго прыхільнікаў сустракаць яго ў аэрапорце па вяртанні з Германіі. У пятніцу пракуратура Масквы папярэдзіла пра «публічнае мерапрыемства» ў аэрапорце Унукава, якое праходзіць без дазволу. Арганізацыя гэтага «мерапрыемства» і ўдзел у ім пацягнуць «адказнасць, прадугледжаную заканадаўствам», – абвясціла пракуратура.
Федэральная служба выканання пакаранняў Расіі абвясціла, што зробіць усё неабходнае для арышту Навальнага. Раней служба прасіла суд замяніць умоўны тэрмін, да якога Навальны быў прыгавораны ў 2014 годзе, адбываннем пакарання ў калоніі ўзмоцненага рэжыму.
Навальны апынуўся ў Германіі ў жніўні 2020 года, калі па просьбе сям'і быў дастаўлены з омскага шпіталя пасля спробы атручэння.
ав