Паліцыя выявіла ў шопе ў галандскай вёсцы Дэ-Квакель 3000 кг какаіну і 11 мільёнаў еўра наяўнымі. У сховішчы наркотыкаў вісеў вялікі партрэт Марлана Бранда ў ролі дона Віта Карлеонэ з «Хроснага бацькі».
«Падчас ператрусу мы не маглі паверыць сваім вачам. Шопа літаральна да самага краю была запоўнена блокамі какаіну і мяшкамі, поўнымі наяўных грошай», – сказаў адзін з паліцэйскіх.
На месцы таксама была знойдзеная агнястрэльная зброя, боепрыпасы і машыны для падліку грошай. Паліцыя падазрае, што знаходка належала паўднёваамерыканскай мафіі, магчыма, з Мексікі.
У маі гэтага году кіраўнік нацыянальнага аддзелу расследаванняў Эндзі Крааг заявіў De Telegraaf, што занепакоены ростам актыўнасці паўднёваамерыканскіх наркакартэляў у Нідэрландах.
«Нідэрланды – гэта вароты Еўропы для какаіну», – адзначыў Крааг.
нг