Галоўны прадстаўнік міжнароднай супольнасці ў Босніі папярэдзіў, што гэтая пацярпелая ад вайны балканская краіна можа сутыкнуцца з найбуйнейшай «пагрозай свайму існаванню за ўвесь пасляваенны перыяд», калі міжнародная супольнасць не перадухіліць рэалізацыю сепаратысцкіх пагроз баснійскіх сербаў.
Высокі прадстаўнік па Босніі і Герцагавіне Крысціян Шмідт павінен быў агучыць гэтае папярэджанне на брыфінгу ў Савеце Бяспекі ААН, але савет заявіў, што яго выступ быў адменены з-за процідзеяння Расіі – блізкага саюзніка Сербіі і баснійскіх сербаў.
«Перспектывы далейшага расколу і канфлікту вельмі рэальныя», калі лідар баснійскіх сербаў Міларад Додзік выведзе сербскія войскі з баснійскай арміі і створыць асобныя сербскія сілы, гаворыцца ў вытрымках з падрыхтаванага выступу Шміта на брыфінгу, апублікаванага баснійскім парталам Klix.ba.
У выпадку рэалізацыі гэтых крокаў і іншых пагроз, яны, « у канчатковым выніку, падарвуць здольнасць дзяржавы функцыянаваць і выконваць свае канстытуцыйныя абавязкі», напісаў Шмідт. Высокапастаўлены нямецкі дыпламат, назваў пагрозы Додзіка «раўнасільнымі аддзяленню без абвяшчэння такога».
Кіраўнік баснійскіх сербаў Міларад Додзік назваў даклад высокага прадстаўніка ААН «прапагандысцкім памфлетам», напісаным «у падтрымку баснійскіх мусульманаў».
паводле AP/эж