Людзі застаюцца на беларускай тэрыторыі, але Ірак плануе наступны эвакуацыйны рэйс, каб вярнуць іх на радзіму з няпростых умоваў, у якія яны трапілі.
Берлін афіцыйна адмовіў рэжыму Лукашэнкі ў прыняцці на сваю тэрыторыю 2 тысяч мігрантаў з краін Блізкага Ўсходу. Пра гэта паведаміў прадстаўнік нямецкага ўраду, піша Deutsche Welle.
Міністэрства замежных спраў Нямеччыны трымае кантакт з беларускімі ведамствамі праз сваю амбасаду ў Мінску. Гэта стала вядома са словаў афіцыйнай прадстаўніцы міністэрства Андрэа Засэ.
Раніцай 22 лістапада кіраўнік МЗС Нямеччыны Хайка Маас (Heiko Maaß) назваў дзеянні Лукашэнкі ў міграцыйным крызісе «цынічным выкарыстаннем людзей».
Раней непрызнаныя ўлады Беларусі заявілі, што ня будуць выконваць свае міжнародныя абавязальніцтвы па ахове мяжы і вырашылі спрыяць пропуску мігрантаў у Еўрасаюз, спасылаючыся на ўласнае жаданне саміх мігрантаў трапіць да сваякоў у Нямеччыну. Гэта справакавала буйны памежны канфлікт з сумежнымі Польшчай, Латвіяй і Літвой.
Пасля гэтага Аляксандр Лукашэнка, Уладзімер Макей і іншыя прадстаўнікі непрызнаных ЕС і ЗША ўладаў сталі вінаваціць у стварэнні крызісу з мігрантамі краіны Захаду.
"Радыё Свабода" / вх