Еўрасаюз увёў санкцыі ў адносінах да чатырох юрыдычных і васьмі фізічных асоб, якія, як мяркуюць у Бруселі, звязаны з «групай Вагнера».
Заходнія краіны лічаць, што Крэмль выкарыстоўвае групу наймітаў, што мае цесныя фінансавыя сувязі з даўнім сябрам прэзідэнта Расіі Уладзіміра Пуціна Яўгенам Прыгожыным, у якасці рычагоў уплыву ў міжнародных канфліктах.
Імёны асоб і кампаній, якія трапілі пад абмежаванні, пакуль не называюцца. Падрабязнасці будуць апублікаваны ў афіцыйным часопісе ЕС, санкцыі набудуць моц пасля публікацыі.
Меры ўключаюць замарозку актываў кампаній і грамадзян у заходніх краінах, а таксама забарону на замежныя паездкі ў адказ на дзейнасць ПВК «Вагнер» у Сірыі, Украіне і Афрыцы.
Цяперашнія рэстрыкцыі ўведзены праз год пасля таго, як Брусель увёў персанальныя санкцыі супраць Яўгена Прыгожына, якога ў прэсе часта называюць «кухаром Пуціна» за яго цесныя сувязі з Крамлём. Яўген Прыгожын у пятніцу заявіў, што не мае сувязяў з «Вагнерам».
Раней сёлета міністр абароны Францыі Флорэнс Парлі перасцерагла ўлады Малі ад заключэння здзелкі з расійскай ахоўнай кампаніяй ПВК «Вагнер». Францыя, якая баіцца, што Масква ўзмацняе свой уплыў у краінах Афрыкі, кажа што, наймаючы «вагнераўцаў», Малі ўскладніць французскія антытэрарыстычныя аперацыі ў гэтай краіне.
«Цяпер «група Вагнера» дзейнічае ў Сірыі, Лівіі, Украіне, дзе падрывае тэрытарыяльную цэласнасць, і гэтыя людзі маюць дачыненне да грубых парушэнняў правоў чалавека», – заявіў у інтэрв'ю агенцтву Рэйтэр высокапастаўлены чыноўнік, знаёмы з рашэннем Еўразвяза.
Французскія афіцыйныя асобы заяўляюць, што ваенная хунта, якая захапляе ўладу ў Малі, звяртаецца па дапамогу да наймітаў «Вагнера» ў спробе ўтрымацца ва ўладзе пасля пераходнага перыяду, які павінен скончыцца пасля прэзідэнцкіх выбараў і выбараў у заканадаўчыя органы 27 лютага 2022 года.
Крэмль заяўляе, што наёмніцтва забаронена расійскім заканадаўствам, і адхрышчваецца ад якіх-небудзь сувязяў з «групай Вагнера». Пры гэтым прэзідэнт Расіі Уладзімір Пуцін казаў у снежні 2018 года, што расійскія прыватныя ваенныя падрадчыкі маюць права працаваць і пераследаваць свае інтарэсы ў любой кропцы свету, пакуль яны не парушаюць расійскія законы.
Паводле ВВС / вх