Злучаныя Штаты Амерыкі занепакоеныя прыняццем польскім Сеймам закона аб СМІ, заявіла намеснік прэс-сакратара Дзярждэпартамента Джаліна Портэр. Яна лічыць, што новы закон, рэалізаваны ў цяперашнім выглядзе, можа сур'ёзна падарваць свабоду СМІ ў краіне, а таксама паўплываць на клімат замежных інвестыцый у Польшчы.
Джаліна Портэр абвясціла, што Злучаныя Штаты Амерыкі будуць заахвочваць прэзідэнта Анджэя Дуду пацвердзіць свае ранейшыя дэкларацыі адносна свабоды выказвання меркаванняў, непарушнасці пагадненняў і агульных каштоўнасцяў, якія з’яўляюцца асновай адносін паміж Польшчай і ЗША.
Яна адзначыла, што адміністрацыя прэзідэнта Джо Байдэна ставіць правы чалавека, у тым ліку свабоду выказвання меркаванняў і свабоду СМІ, у цэнтры знешняй палітыкі.
Нагадваем, учора Сейм адхіліў рашэнне Сенату аб унясенні паправак у закон аб СМІ. У верасні Сенат цалкам адхіліў законапраект. Цяпер закон будзе перададзены прэзідэнту.
Новыя правілы прадугледжваюць, што кампаніі, сядзіба якіх не знаходзіцца на тэрыторыі Еўрапейскай эканамічнай зоны, не могуць мець большасці ў польскіх СМІ. Гэта тычыцца, у тым ліку, тэлевізіі TVN, якая належыць амерыканскаму канцэрну Discovery.
IAR/аз