Беларуская Служба

Пуцінскі рэжым плануе сабраць на вайну ва Украіне мільён чалавек

22.09.2022 17:24
Адзіны спосаб затрымаць расійскую арду - паставіць Украіне больш цяжкай зброі.
У Расіі разганяюць пратэсты супраць мабілізацыіфота: PAP/EPA/ANATOLY MALTSEV

Сталі вядомыя некаторыя падрабязнасці пункта нумар 7 указа аб мабілізацыі ў Расіі.

Як паведаміла апазіцыйнае расійскае выданне «Новая газета. Еўропа» са спасылкай на крыніцы ў адміністрацыі прэзідэнта РФ, у пункце №7 указа была графа «для службовага карыстання». Крыніцы выдання паведамілі, што ў пункце гаворыцца аб магчымасці сабраць на вайну з Украінай да аднаго мільёна рэзервістаў.

Акрамя таго, лічбу некалькі разоў выпраўлялі, аднак у выніку спыніліся на мільёне чалавек.

Раней міністр абароны Сяргей Шайгу заяўляў аб тым, што РФ плануе мабілізаваць 300 тысяч чалавек.

Адзіным спосабам спыніць краіну-агрэсара Расію з'яўляецца прадастаўленне Украіне большай колькасці цяжкай зброі. Пра гэта заявіў дарадца кіраўніка Офіса прэзідэнта Украіны Міхаіл Падаляк у Twitter.

«Жаданне Расіі мабілізаваць мільён чалавек, пераставіць эканоміку на ваенныя рэйкі і зарадзіць гэты натоўп ядзернай чалавеканенавісніцкай прапагандай - гэта прамая пагроза Польшчы, краінам Балтыі і ўсёй Еўропе. Адзіны спосаб спыніць гэтую арду - даць Украіне больш цяжкай зброі. Цяпер», - напісаў ён.

нг