Урад Украіны дазволіць прымусовую эвакуацыю дзяцей з акупаваных тэрыторый, калі бацькі не змогуць забяспечыць бяспеку дзіцяці. Міністэрства па рэінтэграцыі часова акупаваных тэрыторый распрацавала пастановы, якія павінны ўступіць у сілу ўжо на наступным тыдні.
Як паведаміў прэм'ер-міністр Украіны Дзяніс Шмыгаль, гаворка ідзе не пра тое, каб забраць дзяцей у бацькоў, а пра тое, каб іх забраць з зоны баявых дзеянняў:
- У бацькоў, якія ажыццяўляюць догляд дзіцяці і якіх не пазбавілі бацькоўскіх правоў, дзіця не можа быць адабрана і вывезена без іх згоды. Гэта было б выкраданне. Мы не можам красці дзяцей ва ўкраінскіх семʼях. Аднак, калі ёсць пагроза жыццю дзіцяці, мы працуем над прымусовай эвакуацыяй дзіцяці з адным з бацькоў. Гэта магчыма, і толькі на гэты аспект скіраваная ініцыятыва Мінрэінтэграцыі і Міністэрства сацыяльнай палітыкі.
Прымусовая эвакуацыя павінна праводзіцца па ўзгадненні з мясцовымі ваеннымі ўладамі. Бацькі не змогуць абскардзіць рашэнне.
яс