Выданне The Washington Post у суботу, 18 лістапада апублікавала аўтарскі артыкул Джо Байдэна, у якім прэзідэнт ЗША разважае пра вайну Расіі супраць Украіны, а таксама пра вайну Ізраілю супраць ХАМАС.
У сваёй калонцы Байдэн зноў параўноўвае дзеянні расійскага прэзідэнта Уладзіміра Пуціна ва Украіне з атакамі тэрарыстычнай арганізацыі ХАМАС на Ізраіль.
«І Пуцін, і ХАМАС змагаюцца за тое, каб сцерці з мапы суседнія дэмакратыі. І Пуцін, і ХАМАС спадзяюцца разбурыць рэгіянальную стабільнасць і інтэграцыю і скарыстацца ўзніклай бязладзіцай. Амерыка не можа і дазволіць гэтаму здарыцца – у інтарэсах нашай нацыянальнай бяспекі і на карысць усяго свету», – напісаў Джо Байдэн.
У сваім артыкуле прэзідэнт ЗША таксама гаворыць аб тым, што краіна «падтрымлівае адважных украінцаў, якія абараняюць сваю свабоду і радзіму».
«Мы даем ім зброю і эканамічную дапамогу, каб спыніць імкненне Пуціна да заваёвы, перш чым канфлікт распаўсюдзіцца далей», – піша Джо Байдэн, які таксама заявіў аб падтрымцы Ізраілю ў барацьбе з ХАМАС. Палестынцы заслугоўваюць права мець уласную дзяржаву, – перакананы Джо Байдэн.
voa/эж