У Кіеў з неабвешчаным візітам прыбыў міністр абароны Нямеччыны Барыс Пісторыус. Там ён павінен запэўніць украінскія ўлады ў падтрымцы супраць расійскай агрэсіі.
Падчас візіту кіраўнік Мінабароны Германіі сустрэнецца са сваім украінскім калегам і прэзідэнтам Уладзімірам Зяленскім. Нямецкі палітык таксама наведае вайсковы навучальны цэнтр.
Гэта другі візіт Барыса Пісторыуса ва Украіну з пачатку вайны, ён адбываецца падчас напружаных баёў на фронце. Першы адбыўся ў лютым. Кіеў таксама асцерагаецца больш сур'ёзных нападаў на сваю энергетычную інфраструктуру і чакае запэўненняў у далейшай падтрымцы з боку міжнароднай супольнасці, увага якой зараз прыкавана да канфлікту на Блізкім Усходзе.
Нямеччына з'яўляецца адным з найбуйнейшых пастаўшчыкоў вайсковай падтрымкі для Украіны. Пакуль Берлін накіраваў туды, сярод іншага, танкі, сістэмы супрацьпаветранай абароны і боепрыпасы. Агрэсія Расіі таксама прывяла да павелічэння выдаткаў на абарону ў самой Германіі.
ПР/юл