Санітарны крызіс пануе ў турыстычным горадзе Торы-дэль-Бенака на возеры Гарда ў Італіі. Там выяўлена каля тысячы выпадкаў страўнікава-кішачнай інфекцыі, выкліканай норавірусамі. Лічыцца, што яны могуць быць у водаправоднай сетцы. Ужыванне пітной вады з крана забаронена.
Некалькі сотняў чалавек звярнуліся ў мясцовыя бальніцы за апошнія дні з сур'ёзнымі сімптомамі, паведамляюць мясцовыя СМІ ў рэгіёне Венета.
Жыхарам і турыстам дастаўляюць ваду ў бутэльках. Туды ўвесь час прыязджаюць фуры з новым транспартам.
Улады заклікаюць усіх рэгулярна дэзынфікаваць рукі і не выкарыстоўваць ваду з-пад крана для падрыхтоўкі ежы.
Мэр маляўнічага горада, які наведваюць турысты з многіх краін, Стэфана Нікатра звярнуўся да ўладаў суседняй Вяроны з просьбай аб дапамозе ў сувязі з масавай хваляй інфекцый, якая перавышае магчымасці мясцовай аховы здароўя.
СМІ паведамляюць, што прычына распаўсюджвання хваробы ў такіх вялікіх маштабах пакуль не ясная, але ёсць падазрэнні, што гэта магло быць выклікана прысутнасцю віруса ў пітной вадзе пасля моцных дажджоў у апошнія тыдні. У возеры Гарда, з якога гміна бярэ пітную ваду, выяўлены значна павышаны ўзровень вады.
Агенцтва, якое кіруе мясцовым водазабеспячэннем, паведаміла, што ў пробах вады, узятых з водаправоду ў нядзелю, віруса не выяўлена. Аднак напярэдадні ён быў выяўлены ў пробах з некалькіх суседніх вадаёмаў.
PAP/юл