Арганізацыя сустрэчы паміж Уладзімірам Зяленскім і Уладзімірам Пуціным такая ж складаная, як змешванне алею і воцату, заявіў прэзідэнт ЗША. Дональд Трамп сказаў журналістам у Вашынгтоне, што пакуль невядома, ці будзе ён удзельнічаць у такой сустрэчы:
- Паглядзім, ці будуць Пуцін і Зяленскі супрацоўнічаць. Гэта трохі падобна на змешванне алею і воцату. Яны не ладзяць па зразумелых прычынах, але паглядзім, ці давядзецца мне там быць. Лепш было б, каб мяне там не было. Я б хацеў, каб спачатку яны самі сустрэліся і паглядзелі, як у іх справы.
Амерыканскі прэзідэнт нагадаў, што, нягледзячы на бягучую падрыхтоўку да сустрэчы Зяленскі-Пуцін, баявыя дзеянні ва Украіне працягваюцца:
- Тым часам яны надалей ваююць і забіваюць людзей. Гэта вялікае глупства, таму што яны губляюць па сем тысяч чалавек на тыдзень, у асноўным жаўнераў.
Дональд Трамп прызнаўся, што калі ён узяўся арганізаваць сустрэчу паміж лідарамі Расіі і Украіны, ён думаў, што гэта будзе задача сярэдняй складанасці – аказалася, што яна вельмі складаная. Усё ж амерыканскі лідар нагадаў, што да гэтага часу яму ўдалося спыніць сем войнаў.
IAR/аз