Кітайскі лідар даў высокую ацэнку «новаму падыходу» ЗША ў двухбаковых адносінах. Суперніцтва звышдзяржаў паменшыцца, але Пекін усталёўвае «чырвоныя лініі». Адна з іх — дапамога Тайваню, які Кітай лічыць часткай сваёй тэрыторыі.
Згодна з заявай Міністэрства замежных спраў Кітая, апублікаванай пасля перамоваў Трампа з Сі, лідары выступілі за наладжванне стабільных адносін паміж Пекінам і Вашынгтонам да канца тэрміну паўнамоцтваў Дональда Трампа ў Белым доме.
Перамовы былі сканцэнтраваны на гандлёвых пытаннях. Перамірʼе ў тарыфнай вайне, абвешчанай Трампам супраць Кітая ў мінулым годзе, завяршаецца восенню.
Тайванскае пытанне знаходзіцца на пярэднім плане ў адносінах паміж Пекінам і Вашынгтонам. Кітайскі лідар папярэдзіў Трампа аб непажаданасці далейшага ўдзелу ЗША ў падтрымцы Тайваню. Ён сказаў, што ў «пэўных сітуацыях» гэтае пытанне можа нават справакаваць «канфлікт» паміж ЗША і Кітаем.
Вашынгтон збіраецца прадаць тайванскім уладам зброю на суму больш за 11 мільярдаў долараў. ЗША імкнуцца забяспечыць абароназдольнасць вострава ў выпадку пагрозы.
Мэта Сі Цзіньпіна — як называе гэта кітайская прапаганда — «абʼяднанне» ўсіх кітайскіх зямель падчас яго прэзідэнцтва. Аднак у цяперашняй сітуацыі гэта азначала б узброены канфлікт, які можа перарасці ў рэгіянальную вайну.
ПР/юл