Прэзідэнт Ізраіля Іцхак Герцаг рэкамендуе ўзнагародзіць чатырох пасажыраў рэйса flydubai найвышэйшай грамадзянскай узнагародай за гераізм. Улады Аб'яднаных Арабскіх Эміратаў пачалі расследаванне, каб вызначыць, ці была атака другога пілота тэрарыстычным актам.
Герцаг хоча, каб Прэзідэнцкая ўзнагарода за грамадзянскі гераізм была прысуджана тром мужчынам, якія ўвайшлі ў кабіну пілотаў і затрымалі другога пілота, а таксама лекару на борце, які аказаў дапамогу цяжка параненаму капітану.
Інцыдэнт адбыўся ў сераду раніцай на борце рэйса flydubai з Дубая ў Тэль-Авіў. Паводле звестак ізраільскіх уладаў, другі пілот нанёс нажавое раненне капітану і спрабаваў выклікаць катастрофу. Самалёт пачаў хутка губляць вышыню. Параненаму капітану ўдалося адчыніць дзверы кабіны пілотаў, што дазволіла тром ізраільцянам увайсці ў кабіну і затрымаць нападніка, а адзін з іх стабілізаваў самалёт. Затым два пілоты flydubai, якія ляцелі ў якасці пасажыраў, узялі пад кантроль самалёт і здзейснілі аварыйную пасадку ў Саудаўскай Аравіі.
Прэзідэнт таксама адзначыў аднаго з мужчын, які першым папярэдзіў іншых пра праблемы ў кабіне пілотаў, і падзякаваў капітану самалёта.
Прэзідэнцкая ўзнагарода за грамадзянскі гераізм — найвышэйшая грамадзянская ўзнагарода Ізраіля за гераізм. Герцаг заснаваў яе пасля нападу ХАМАС на Ізраіль 7 кастрычніка 2023 года.
Генеральны пракурор ААЭ ў чацвер загадаў расследаваць інцыдэнт. У ходзе расследавання будзе ўстаноўлена, ці быў ён звязаны з тэрарыстычнай дзейнасцю і ці быў ён спланаваны загадзя, ці быў ажыццёўлены па чыімсьці загадзе.
Прэмʼер-міністр Біньямін Нетаньяху заявіў CNN, што пасажырам і экіпажу «ўдалося прадухіліць катастрофу, параўнальную з тэрактам у Злучаных Штатах 11 верасня (2001 года)».
РАР/ав