Паводле апошніх звестак, у выніку ўдару па аэрапорце Эр-Рыяда загінулі прынамсі 12 чалавек, яшчэ 309 атрымалі раненні. Сярод загінулых — грамадзяне Саудаўскай Аравіі, а таксама Бангладэш, ЗША, Сірыі і Іарданіі. Напады на саудаўскія аэрапорты — у прыватнасці, на аэрапорт у сталіцы — працягваюцца ўжо амаль тыдзень. Хоць яны і прыводзілі да ахвяр і разбурэнняў, ніводзін з папярэдніх удараў не меў такіх цяжкіх наступстваў з пункту гледжання колькасці загінулых.
Генеральны сакратар ААН Антоніу Гутэрыш нагадаў, што напады на грамадзянскія аб'екты з'яўляюцца парушэннем міжнароднага права. Кааліцыя на чале з Саудаўскай Аравіяй паабяцала прыняць меры ў адказ супраць еменскіх хусітаў. Прэзідэнт Дональд Трамп разглядае магчымасць далучэння амерыканскіх ваенных да гэтай кааліцыі.
У Емене, у паўднёвай частцы Аравійскага паўвострава, ідуць жорсткія баі. У выніку інтэнсіўных авіяўдараў хусіты, якія ў сярэдзіне верасня захапілі кантроль над узбярэжжам уздоўж Баб-эль-Мандэбскага праліва, нясуць цяжкія страты. Хусіты працягваюць утрымліваць больш за 70 супрацоўнікаў гуманітарных арганізацый, пераважна з ААН. Сем з іх абвінавачваюцца ў шпіянажы — злачынстве, за якое прадугледжана смяротнае пакаранне.
IAR/нг