Яцэк Чапутовіч асудзіў рэакцыю РФ на дэмантаж помніка Коневу ў Празе

«Гэта было вельмі агрэсіўнае ўмяшанне ў свабоду і суверэнітэт Чэшскай Рэспублікі», – падкрэсліў кіраўнік МЗС Польшчы.

Я. Чапутовіч і Т. Петржычак

PAP/Piotr Nowak

Рэакцыя Расіі на дэмантаж помніка савецкаму маршалу Коневу ў Празе была ўмяшаннем у свабоду і суверэнітэт Чэшскай Рэспублікі. Такую ацэнку падзеям, звязаным з манументам, даў міністр замежных спраў Польшчы Яцэк Чапутовіч на прэс – канферэнцыі, праведзенай паводле вынікаў сустрэчы са сваім чэшскім калегам Томашам Петржычак у Празе 27 траўня.

«Міністр Петржычак згадаў пра сітуацыю, звязаную з помнікам Коневу ў Празе. Гэта было вельмі агрэсіўнае ўмяшанне ў свабоду і суверэнітэт Чэшскай Рэспублікі», – падкрэсліў Яцэк Чапутовіч.

Міністр замежных спраў Польшчы таксама нагадаў, што ў дні 75-гадовай гадавіны заканчэння Другой сусветнай вайны ў Цверы былі знятыя дзве мемарыяльныя дошкі, устаноўленыя ў памяць аб рэпрэсаваных.

Адна з іх была прысвечана палякам, расстраляным у 1940 г. у Катыні органамі НКУС СССР. «Мы ўспрымаем гэта як спробу перагляду сусветнай гісторыі. Мы лічым, што павінны разам рашуча выступіць супраць гэтага», – заявіў кіраўнік МЗС Польшчы.

Мемарыяльная дошка з тэкстам «Памяці палякаў з лагера Асташкаў забітых НКУС у Калініне дзеля засцярогі свету» была ўсталяваная ў 1992 годзе прадстаўнікамі польскай грамадскай арганізацыі «Сям'і Катыні» са згоды тагачаснай адміністрацыі Цверы.

паводле radio.cz/эж