Амбасадар Расіі ў Польшчы Сяргей Андрэеў заявіў, што польская пракуратура арыштавала грошы з рахункаў амбасады і гандлёвага прадстаўніцтва Расіі. Нацыянальная пракуратура выступіла з заявай па гэтай справе, паведамляе tvp.info.
У сераду ў інтэрв'ю прапагандысцкаму агенцтву РІА «Новости» амбасадар Сяргей Андрэеў паскардзіўся, што «сродкі з рахункаў расійскай амбасады і гандлёвай палаты ў банку Santander былі пераведзены на рахункі пракуратуры«.
Паводле расійскага амбасадара, гэта былі «значныя сродкі» ў доларах ЗША і злотых. Амбасадар Расіі назваў згаданае дзеянне «грубым парушэннем Венскай канвенцыі аб дыпламатычных адносінах».
Прэс-сакратар Нацыянальнай пракуратуру Польшчы Лукаш Лапчыньскі паведаміў, што на падставе паведамлення ад 2 сакавіка 2022 года Генеральнага інспектара фінансавай інфармацыі, Мазавецкае аддзяленне Дэпартамента па арганізаванай злачыннасці і карупцыі Нацыянальнай пракуратуры пачало расследаванне і вынесла пастанову аб блакіроўцы рахункаў расійскай амбасады. Ён дадаў, што рашэнне пракуратуры ў ліпені 2022 года падтрымаў Акруговы суд варшаўскага раёна Срудмесце.
Прэс-сакратар Нацыянальнай пракуратуру Польшчы Лукаш Лапчыньскі паясніў, што нядаўна пракуратура вынесла пастанову «аб змене прававой формы захоўвання сродкаў, якія падлягаюць блакіроўцы, пра што субʼект, у дачыненні да якога блакіроўкі былі ўведзеныя, быў паведамлены копіяй пастановы».
Банкаўскі рахунак амбасады Расіі ў Варшаве быў заблакаваны яшчэ ў канцы лютага 2022 года, то бок праз некалькі дзён пасля нападу Расіі на Украіну. Як высветліў Business Insider Polska, тое самае было зроблена з банкаўскім рахункам Гандлёвага прадстаўніцтва Расіі ў Польшчы.
Спачатку сродкі на рахунках арыштаваў Генеральны інспектар фінансавай інфармацыі, а пазней пракуратура прадоўжыла згаданы арышт на паўгода. Следчыя матывавалі сваё рашэнне тым, што грошы з рахунку амбасады могуць быць выкарыстаныя для фінансавання тэрарызму.
Як паведамляў у сярэдзіне сакавіка тэлеканал TVN24, пасля ўварвання Расіі ва Украіну дыпламаты расійскай амбасады ў Варшаве спрабавалі зняць наяўнымі больш за 2 мільёны еўра. Аднак гэта ім не ўдалося.
аз