Расійскія страты салдат у баях вакол Аўдзееўкі роўныя адной армейскай брыгадзе, заявіў прэзідэнт Украіны Уладзімір Зяленскі. Расіяне больш за два тыдні інтэнсіўна, але беспаспяхова атакуюць гэты горад пад Данецкам.
Як паведамляе прэс-служба прэзідэнта Украіны Уладзіміра Зяленскага, страты расіян склалі як мінімум адну брыгаду. Пра гэта ўкраінскі прэзідэнт паведаміў у тэлефоннай размове з прэм'ер-міністрам Вялікабрытаніі Рышы Сунакам. Пры гэтым ён не ўдакладніў, колькі менавіта вайскоўцаў страціў расійскі бок. Брыгада ў расійскай арміі можа складацца з 2000-4000 салдат.
У сваю чаргу, паводле апошніх амерыканскіх ацэнак, расіяне, акрамя людскіх страт, страцілі яшчэ больш за 120 адзінак бронетэхнікі. Нягледзячы на няўдачы, расіяне спрабуюць акружыць Аўдзееўку з поўначы і поўдня, але, як растлумачыў кіраўнік вайсковай адміністрацыі Аўдзееўкі Віталь Барабаш, усе іх атакі адбітыя і за апошнія 24 гадзіны яны не дамагліся поспехаў, а ўкраінцы захоўваюць свае пазіцыі.
Кіраўнік гарадской адміністрацыі падкрэсліў, што акупанты часта атакуюць, а таксама яны інтэнсіўна выкарыстоўваюць артылерыю і авіяцыю. Да вайны Аўдзееўка была горадам з больш чым 30 тысячамі жыхароў. Цяпер там застаюцца каля 1500 чалавек.
ПР/юл