Прэм’ер-міністр Венгрыі Віктар Орбан пацвердзіў у Бруселі, што Будапешт не падтрымлівае пачатак перамоў аб далучэнні Украіны да Еўрапейскага Саюза. Пра гэта палітык заявіў перад адкрыццём чарговага саміту ЕС у чацвер, 26 чэрвеня. Паводле кіраўніка венгерскага ўрада, асноўнай перашкодай для пачатку перамоў з’яўляецца вайна, якая працягваецца ва Украіне:
«Калі мы інтэгруем Украіну ў Еўрапейскі Саюз, то разам з ёй інтэгруем і вайну. Мы не хочам быць часткай супольнасці, якая ўключае краіну ў стане вайны, бо гэта непасрэдная пагроза для нас. Калі адзін з членаў Еўрапейскага Саюза ваюе, то ўся супольнасць апынаецца ў стане вайны. А нам гэта не падабаецца», — заявіў Орбан.
Польскае старшынства ў Радзе ЕС, якое ўласна завяршаецца, планавала распачаць фармальныя перамовы аб уступленні Украіны ў ЕС, адкрыўшы адзін з раздзелаў перамоўнага працэсу. Аднак Венгрыя выступіла супраць, а рашэнне павінна быць прынятае аднагалосна.
У сувязі з гэтым з’явілася прапанова распачаць нефармальныя перамовы, але частка краін, а таксама Еўрапейская камісія, паставілася да яе скептычна. Працэс далучэння Украіны да ЕС зноў апынуўся пад пытаннем.
IAR/эж