Паўднёвая Еўропа сутыкнулася з першай сёлета хваляй спёкі. У выходныя тэмпература ў Іспаніі, Партугаліі, Італіі, Грэцыі і на поўдні Францыі перавысіла 40 °C. Мясцовыя ўлады папярэджваюць пра высокую пагрозу пажараў і заклікаюць пазбягаць знаходжання на сонцы ў найбольш гарачыя гадзіны дня.
У іспанскай Андалусіі, у горадзе Эль-Гранада, зафіксавана рэкордная для чэрвеня тэмпература — 46 градусаў. Гэта найвышэйшы паказнік у гісторыі чэрвеньскіх назіранняў у краіне. Жыхарка Севільі Эсперанса адзначае, што нават уначы надзеі на астуджанне не было:
«Уначы трэба трымаць усё адкрытым, каб ахаладзіць кватэру. Але сёння наогул не стала халадней. Я вельмі дрэнна спала з-за спёкі».
У Партугаліі дзве траціны тэрыторыі ахоплены найвышэйшым узроўнем пажарнай і метэаралагічнай трывогі. У Лісабоне тэмпература дасягнула 42 °C.
У Францыі аранжавы ўзровень небяспекі ўведзены ў 84 з 96 дэпартаментаў. У Італіі Міністэрства аховы здароўя абвясціла найвышэйшы ўзровень цеплавой трывогі для 21 з 27 буйных гарадоў. Улады плануюць абмежаваць працы на адкрытым паветры ўдзень.
У Грэцыі побач з храмам Пасейдона ля Афінаў адбыўся вялікі пажар, давялося эвакуяваць мясцовых жыхароў і турыстаў. У тушэнні ўдзельнічала больш за 130 пажарных, самалёты і верталёты.
Улады еўрапейскіх краін заклікаюць піць больш вады, пазбягаць фізічных нагрузак і адкрытага сонца.
IAR/эж