Пасля святкавання Дня польска-венгерскага сяброўства ў Польшчы (23 сакавіка) прэзідэнт Караль Наўроцкі вылеціць у Будапешт, каб яшчэ раз сустрэцца з прэзідэнтам Тамашам Шуёкам і прэм'ерам Віктарам Орбанам.
Венгерскія СМІ чакаюць, што прэзідэнт Польшчы падтрымае кіраўніка венгерскага ўрада, які балатуецца на чарговы тэрмін паўнамоцтваў. Нагадаем, парламенцкія выбары ў Венгрыі адбудуцца 12 красавіка.
Згаданы крок раскрытыкаваў міністр замежных спраў Польшчы. «Я хацеў бы ведаць, чаму Польшча павінна падтрымліваць самага карумпаванага і прапуцінскага палітыка ў Еўропе», – задаецца пытаннем Радаслаў Сікорскі (Radosław Sikorski):
— На жаль, гэта відавочнае заангажаванне ў выбарчую кампанію і падтрымка дзейнага прэм’ера, які, дарэчы, блакуе важныя польскія ініцыятывы. Нагадаю, Венгрыя блакуе выплату Польшчы кампенсацыі за ваенную дапамогу, якую мы аказалі Украіне. Гаворка ідзе пра два мільярды злотых.
Віцэ-прэмʼер дадаў, што Будапешт таксама блакуе іншыя ініцыятывы ЕС, у тым ліку 20-ы пакет санкцый супраць Расіі.
— Дадаткова Венгрыя блакуе выплату Украіне пазыкі ў памеры 90 мільярдаў еўра, якая павінна дапамагчы краіне абараняцца ад Пуціна. Усё гэта важныя справы. Калі б, напрыклад, прэзідэнт (Караль Наўроцкі- рэд.) дабіўся адмены вугорскага вета або прывёз з сабой назад у Польшчу дваіх уцекачоў, якія ў Вугоршчыне хаваюцца ад польскай сістэмы правасуддзя, тады я б зразумеў… Усё ж пакуль я не разумею, якім чынам гэтая паездка выгадна Польшчы.
Між тым, газета The Washington Post паведаміла, што міністр замежных спраў Венгрыі даўно перадае міністру замежных спраў Расіі бягучую інфармацыю з самітаў ЕС.
IAR/аз