— Еўропа хацела б атрымаць яснасць адносна доўгатэрміновых планаў ЗША што да ваеннай прысутнасці на кантыненце, — заявіў камісар ЕС па пытаннях абароны і касмічнай прасторы Андрус Кубілюс у суботу пасля падпісання пагаднення паміж Літвой і Еўрапейскай камісіяй па праграме SAFE ў Вільнюсе. — Было б добра мець выразнае разуменне таго, як амерыканцы плануюць працягваць сваю абарончую прысутнасць у Еўропе ў доўгатэрміновай перспектыве. Мы хацелі б, каб яны заставаліся тут як мага даўжэй, але ў той жа час нам трэба развіваць уласныя магчымасці, – сказаў Кубілюс журналістам.
Паводле звестак Пентагона, прыблізна 5000 амерыканскіх вайскоўцаў будуць выведзены з Германіі на працягу наступных 6-12 месяцаў. Заява аб вывадзе амерыканскіх войскаў адбылася пасля абмену рэплікамі паміж прэзідэнтам ЗША Дональдам Трампам і канцлерам Германіі Фрыдрыхам Мерцам адносна вайны з Іранам. Мерц, як паведамляецца, заявіў, што іранскія перамоўшчыкі «прынізілі» Вашынгтон.
Трамп таксама нібыта пагражаў вывесці войскі з Італіі і Іспаніі з-за нежадання гэтых краін удзельнічаць у канфлікце на Блізкім Усходзе.
Кубілюс прызнаў, што Еўропа прызвычаілася да «непрадказальнасці» Трампа, але таксама адзначыў, што Вашынгтон даўно чакаў, што еўрапейскія саюзнікі возьмуць на сябе асноўную адказнасць за канвенцыйную абарону кантынента.
— Мы павінны зразумець абгрунтаванне дзеянняў амерыканцаў і развіваць уласныя магчымасці. Мы павінны падумаць, як мы заменім цяперашнія абарончыя магчымасці, якія прадастаўляюцца ЗША ў Еўропе, так званыя стратэгічныя сродкі падтрымкі, і як мы заменім амерыканскіх салдат, якія могуць выступаць у якасці сіл хуткага рэагавання, — сказаў камісар ЕС па пытаннях абароны і касмічнай прасторы.
Паводле дадзеных за снежань мінулага года, у Еўропе было размешчана прыблізна 68 тысяч амерыканскіх салдат.
ПР/юл