Высокі прадстаўнік ААН па Босніі і Герцагавіне Крысціян Шміт сышоў у адстаўку пасля амаль пяці гадоў на згаданай пасадзе. За гэтым рашэннем, верагодна, стаяць амерыканскія і расійскія інтарэсы.
Як афіцыйная прычына яго адстаўкі называюцца асабістыя меркаванні. Аднак балканскія СМІ паказваюць на ціск Расіі і ЗША. Кампанія, цесна звязаная з прэзідэнтам ЗША Дональдам Трампам, хоча пабудаваць газаправод у Босніі і Герцагавіне. Крысціян Шміт, які мае законныя інструменты для ўмяшання ва ўнутраныя справы згаданай краіны, адкрыта выступіў супраць гэтай ідэі.
Крысціян Шміт заняў пасаду Высокага прадстаўніка ААН па Босніі і Герцагавіне ў 2021 годзе. Яго прызначэнне выклікала сумневы, бо яно не было афіцыйна зацверджанае Саветам Бяспекі ААН.
Падчас свайго знаходжання на пасадзе Шміт умешваўся ў выбарчае заканадаўства і абвінавачваў улады Рэспублікі Сербскай у падрыве канстытуцыйнага ладу краіны. Гэта прывяло да асуджэння яе прэзідэнта Міларада Додзіка і яго адхілення ад улады. Цяпер сербскі палітык выказаў задавальненне адстаўкай Шмітa і заклікаў яго вярнуць зарплату, якую ён атрымліваў падчас «нязгоднай з міжнародным правам» службы.
IAR/аз