У панядзелак Міністэрства замежных спраў Кітая раскрытыкавала заклікі заходніх тэхналагічных лідараў запаволіць развіццё штучнага інтэлекту. Міністэрства замежных спраў назвала гэта «распальваннем страху», а наратыў пра пагрозу з боку Пекіна параўнала са «зламыснай канкурэнцыяй», якая парушае працэсы глабальнага кіравання ў галіне.
— Развіццё штучнага інтэлекту служыць агульнаму дабру ўсяго чалавецтва. Усе бакі павінны сумесна прасоўваць ШІ адкрытым, інклюзіўным чынам, які служыць агульнаму дабру, — заявіў прадстаўнік МЗС Кітая Го Цзякунь падчас брыфінгу. — Распаўсюджванне наратываў пра пагрозы, распальванне страху, імкненне да канфрантацыі і зламысная канкурэнцыя не ў інтарэсах ніводнага з бакоў, — падсумаваў ён.
Гэтая заява з'яўляецца адказам на зварот, зроблены ў выхадныя генеральнымі дырэктарамі вядучых амерыканскіх кампаній у галіне штучнага інтэлекту, у тым ліку Дарыа Амадэі з Anthropic, Сэма Альтмана з OpenAI і Ілана Маска. Бізнес-лідары заклікалі спыніць працу над перадавымі мадэлямі з-за ўзрастаючай занепакоенасці рызыкамі, звязанымі са звышінтэлектуальнымі кампʼютарнымі сістэмамі.
Як адзначае BBC, назіральнікі галіны выказваюць абгрунтаваны скептыцызм адносна прапанаванай тэхналагічнай паўзы. Галоўнае пытанне застаецца адкрытым: хто будзе кантраляваць выкананне такіх абмежаванняў? Генеральны дырэктар EZ Primary Research Эд Зітрон недвухсэнсоўна заявіў, што аднабаковае прыпыненне працы амерыканскіх кампаній проста зробіць іх «ўразлівымі» для канкурэнтнага прагрэсу і перадасць ініцыятыву кітайскім лабараторыям.
У канцы ліпеня сам Амадэй таксама заклікаў улады Вашынгтона ўзмацніць забароны на экспарт перадавых працэсараў у Кітай і абмежаваць практыку так званай «дыстыляцыі» — выкарыстання амерыканскіх мадэляў для навучання кітайскіх сістэм. Амадэй публічна сцвярджаў, што дасягненні Кітая ў галіне штучнага інтэлекту ўяўляюць сабой прамую пагрозу для нацыянальнай бяспекі ЗША.
Прэзідэнт ЗША Дональд Трамп таксама закрануў гэтае пытанне, заявіўшы ў нядзелю, што Злучаныя Штаты захаваюць сваё лідарства ў развіцці індустрыі штучнага інтэлекту, дадаўшы, што «хто пераможа ў штучным інтэлекце, той выйграе ўсё».
IAR/ав