— Выдатная навіна! — пачаў прэзідэнт ЗША свой пост на партале Truth Social.
Затым ён заявіў, што дзякуючы кіраўніцтву прэзідэнта Караля Наўроцкага дасягнуты значны прагрэс у стварэнні базы арміі ЗША ў Польшчы. Трамп назваў Наўроцкага сваім сябрам.
— Месцазнаходжанне будзе абвешчана ў бліжэйшы час. Гэта будзе гістарычны крок для нашага вялікага амерыкана-польскага саюза, — дадаў прэзідэнт ЗША.
Трамп не падаў ніякіх падрабязнасцяў — ні даты, ні памеру базы, ні кошту. Таксама невядома, колькі амерыканскіх салдат там будзе размешчана.
У маі Пентагон вывеў з ратацыі ў Польшчы адну брыгадную баявую групу, прыкладна 4000 салдат. Затым Трамп абвясціў аб разгортванні ў Польшчы дадатковых 5000 вайскоўцаў. На сённяшні дзень дадатковыя войскі ў Польшчу не прыбылі.
Пры гэтым Пентагон разглядае магчымасць вываду з Еўропы да дваццаці пяці тысяч вайскоўцаў, і, паводле некаторых крыніц, гэтая лічба можа дасягнуць сарака тысяч. Гэта будзе найбуйнейшае скарачэнне амерыканскай прысутнасці на кантыненце з часоў заканчэння халоднай вайны.
Планы скарачэння былі апублікаваныя NBC са спасылкай на амерыканскіх і заходніх чыноўнікаў. Скарачэнні закрануць не толькі салдат, але і самалёты, караблі і абсталяванне. У першую чаргу яны закрануць Германію, Італію і Іспанію, дзе размешчана большая частка амерыканскіх войскаў. Толькі ў Германіі іх каля 35 000.
Канчатковыя рашэнні пакуль не прынятыя. Камандуючы амерыканскімі і натаўскім войскамі ў Еўропе, генерал Алексус Грынкевіч, павінен прадставіць свой аналіз кіраўніку Пентагона 18 верасня. Ён, верагодна, акрэсліць чатыры варыянты, у тым ліку магчымую перадыслакацыю часткі сіл на ўсходні фланг Альянсу. Чакаецца, што канчатковая рэкамендацыя будзе накіравана міністру абароны Піту Хегсету 6 лістапада, а затым прэзідэнту Дональду Трампу. Навіны аб патэнцыйным скарачэнні з'явіліся ў той жа дзень, калі Дональд Трамп абвясціў аб прагрэсе ў пытанні пастаяннай базы ЗША ў Польшчы.
ПР/юл