Па запрашэнні пасла Вялікабрытаніі ў Беларусі Жаклін Перкінс беларускі гісторык, кандыдат гістарычных навук Ігар Мельнікаў правёў для супрацоўнікаў дыпламатычнай установы гістарычную лекцыю. На сустрэчы спецыяліст па вайсковых пытаннях расказаў пра гісторыю службы беларусаў і ўраджэнцаў Беларусі ў даваенным Войску Польскім, а таксама Другім польскім корпусе і іншых фарміраваннях польскай арміі на Захадзе падчас Другой сусветнай вайны.
Колькі беларусаў сустрэла пачатак вайны ў шыхтах Войска Польскага? У якіх бітвах прыйшлося паўдзельнічаць ім у верасні 1939 года? Праз якія рэпрэсіі прайшлі жыхары далучанай да БССР Заходняй Беларусі? Колькі беларусаў было ў Арміі Андэрса і што такое Бітва пад Монтэ-Касіна? На гэтыя і іншыя пытанні пачулі адказы ўдзельнікі лекцыі.
Значную ўвагу Ігар Мельнікаў надаў апісанню лёсаў простых беларусаў, палякаў і прадстаўнікоў іншых нацыянальнасцяў, якія ў 1941 годзе папоўнілі шэрагі Арміі пад камандаваннем генерала Уладзіслава Андэрса.
Акрамя гэтага, кандыдат гістарычных навук распавёў пра лёс беларускіх жаўнераў польскай Самастойнай паветрана-дэсантнай брыгады падчас аперацыі «Макет-Гадэн» у Галандыі ў 1944 годзе. Нарэшце, гісторык дэталёва асвяціў асаблівасці злачыннай дэпартацыі ветэранаў Другой сусветнай, жаўнераў Войска Польскага на Захадзе, якую ажыццявілі савецкія ўлады ў Беларусі ўвесну 1951 года.
Адмыслова для лекцыі Ігар Мельнікаў прынёс арыгінальныя артэфакты, здымкі, дакументы, рыштунак і ўніформу жаўнераў Другога польскага корпуса.
Плануецца, што ў хуткім часе Пасольства Вялікабрытаніі ў Беларусі перадасць копіі брытанскіх узнагарод чарговай групе сваякоў беларускіх «андэрсаўцаў».
За апошнія пяць гадоў брытанскае дыппрадстаўніцтва ў Беларусі вярнула сямейныя рэліквіі больш чым дваццаці сем’ям нашчадкаў жаўнераў Другога польскага корпуса з Беларусі.
Размову з Ігарам Мельнікавым запісаў Валеры Саўко.
слухайце аўдыёфайл