Прэзідэнт Анджэй Дуда не будзе ўдзельнічаць у 5-ым Сусветным форуме, прысвечаным галакосту (World Holocaust Forum), які арганізуецца ў Ізраілі 22 і 23 студзеня. Галоўным госцем мерапрыемства будзе прэзідэнт Расіі Уладзімір Пуцін. Свой удзел пацвердзілі таксама прэзідэнты Францыі, Германіі і Італіі, паведамляе Gazeta Wyborcza.
Прэзідэнт Польшчы не прыме запрашэння на святкаванне 75-годдзя вызвалення канцлагера „Аўшвіц-Біркенаў”, арганізаванае Інстытутам Яд ва-Шэм у Ерусаліме. Паводле газеты, пра гэта стала вядома ўжо 27 снежня пасля сустрэчы ў Прэзідэнцкім палацы, на якой палітыкі і эксперты абмяркоўвалі апошнія антыпольскія заявы Уладзіміра Пуціна.
Ізраільскія мерапрыемствы разглядаюцца як альтэрнатыва ўрачыстасцям, якія адбудуцца 27 студзеня ў Асвенцыме. Аднак, паводле выдання, асноўная праблема зводзіцца да таго, што падзея ў Ерусаліме не гарантуе кіраўніку Польшчы належнага форуму для выказвання. Галоўнымі выступоўцамі на Сусветным форуме, прысвечаным галакосту, будуць прэзідэнты Расіі і Ізраіла Уладзімір Пуцін і Рэўен Рыўлін.
Апрача таго, мерапрыемства ў Ерусаліме арганізуе кіраўнік Міністэрства замежных спраў Ізраіля Ісраэль Кац, які нейкі час таму праславіўся сваёй заявай пра тое, што „палякі высмакталі антысемітызм з малаком маці”.
Тым часам, удзел у мерапрыемстве, арганізаваным польскім бокам на месцы былога нямецкага канцлагера ў Асвенцыме, пацвердзілі ўжо кароль Іспаніі, нідэрландская каралеўская пара, прэзідэнты Ізраіля, Германіі, Швейцарыі і прэм'ер-міністры Грэцыі, Швецыі і Нідэрландаў. Не ўпершыню прэзідэнта Расіі на гэтае мерапрыемства не запрасілі. Дарэчы, падобным чынам адбылося ў 2015 годзе пасля нападу Расіі на Украіну, паведамляе Gazeta Wyborcza.
аз