Сёння, паважаныя радыёслухачы, прыгатуем вельмі смачны і традыцыйны абед, але з элементам з сонечнай Францыі.
Праўда, гэта будзе другая страва, але яна – вельмі сытная, таму кожны зможа ёй наесціся і без супа.
І так, паважаныя радыёслухачы, сёння прыгатуем праванскія катлеты з бульбяным пюрэ і салатам з пекінскай капусты. Згадзіцеся, абед атрымаецца вельмі інтэрнацыянальны. Акрамя таго, ён смачны, сытны і, як бы банальна не гучала, арыгінальны.
І так, для таго, каб яго прыгатаваць, нам спатрэбіцца кілаграм фаршу (будзем рабіць порцыю на некалькі чалавек; калі ж застанецца, то можна даесці на наступны дзень альбо замарозіць), найлепш змяшанага ялавічнага і свінога ў прапорцыі 50/50. Акрамя таго, бяром адну невялікую і адну вялікую маркоўку, два яйкі, сярэднюю цыбулю, тры-чатыры лыжкі манных групаў, трэцюю частку батона, зялёны кроп і пятрушка – па смаку (калі няма свежай, можна дадаць марожаную альбо сушаную), дзве сталовыя лыжкі прыправы «Праванскія травы», адзін-два зубчыкі часныку, па смаку чорны молаты перац, прыправа тыпу «Вегета», соль.
І так, робім фарш на катлеты са складнікаў. Невялікую маркоўку тром на гэтак званай бурачковай тарцы, цыбулю дробна рэжам нажом, а часнык – сячэм. Раней замочаны ў малацэ батон дадаем у фарш. Замешваем, дадаем прыправы, соль і ўсе складнікі, якія патрэбныя. Пасля гэтага фарш найлепш паставіць у халадзільнік на гадзінку-другую, каб нашыя смакі і водары аб'ядналіся.
Катлеты па-праванску
Вымаем фарш, яшчэ раз перамешваем. На патэльні разаграваем алей, фармуем даволі вялікія катлеты і смажым на вялікім агні, каб яны добра падрумяніліся з абодвух бакоў. Пасля гэтага катлеты перакладваем у каструлю, выліваючы тлушч з патэльні, дадаем парэзаную колцамі маркоўку, духмяны перац, чорны перац гарошкам, і, калі ёсць магчымасць, некалькі гарошын ядлоўца. Заліваем вадой да паловы катлет. Даводзім да кіпепення і тушым 45 хвілін, да гадзіны на малым агні.
Да катлет падамо бульбяное пюрэ. Як яго зрабіць, гаварыць не буду, бо, думаю, кожны ведае, але сапраўднае пюрэ абавязкова робіцца з дадаткам сметанковага масла і тлустага малака альбо смятанкі. Перад тым, як у тоўчаную бульбу дадаць малако альбо смятанку, іх абавязкова трэба добра разагрэць альбо давесці да кіпення!
Да катлет і пюрэ абавязкова павінен быць салат. І так, нам неабходна падрыхтаваць невялікую альбо сярэднюю пекінскую капусту (дарэчы, вельмі папулярную ў Польшчы), адну маркоўку, кіслы яблык, напрыклад, ранет, цыбулю (звычайную альбо чырвоную), чырвоную папрыку, крыху зялёнай пятрушкі.
Капусту шаткуем, цыбулю дробна рэжам нажом, а папрыку, маркоўку і яблык тром на тарцы. Соль, чорны молаты перац і праванскія травы дадаем па смаку. Акрамя таго, у салат дадаем палову гарбатнай лыжачкі цукру, лімонны сок па смаку, які можна замяніць воцатам. Запраўляем рапсавым альбо сланечнікавым алеем. Сябры! Салат выходзіць вельмі асвяжаючы, духмяны і само сабою смачны!
Паспрабуйце зрабіць такі абед і, думаю, не пашкадуеце!
Смачна есці!
Валеры Саўко