МАК пазбавіў акрэдытацыі актывістаў, якія запалохалі Крысціну Ціманоўскую. Два ўдзельнікі алімпійскай зборнай Беларусі – трэнер беларускай лёгкаатлетычнай каманды Юрый Маісевіч і актывіст Артур Шумак, якія спрабавалі прымусіць лёгкаатлетку вярнуцца ў Мінск, павінны пакінуць алімпійскую вёску, паведаміў Міжнародны алімпійскі камітэт.
Rzeczpospolita нагадвае, што Крысціна Ціманоўская расказвала, што Маісевіч і Шумак сказалі, што загад адправіць яе назад у Мінск прыйшоў «зверху».
Увечары ў сераду спартсменка прыляцела ў Варшаву. Раней Крысціна Ціманоўская і яе муж атрымалі польскія гуманітарныя візы.
«Я гатовая дапамагчы людзям, якія могуць апынуцца ў падобнай сітуацыі, або людзям, якія хацелі б пакінуць Беларусь», – сказала Ціманоўская падчас прэс-канферэнцыі ў Варшаве. Яна дадала, што пакуль не разглядала пытання палітычнага прытулку і хоча працягваць сваю спартыўную кар'еру.
З нядзелі беларуска знаходзілася ў пасольстве Польшчы ў Токіа. Пра Крысціну Ціманоўскую сталі шмат гаварыць пасля таго, як прадстаўнікі беларускай алімпійскай зборнай спрабавалі прымусіць яе вярнуцца з Токіа ў Мінск за крытыку іх дзеянняў. У аэрапорце спартсменка папрасіла дапамогі ў японскай паліцыі, а пазней знайшла прытулак у польскай амбасадзе.
На першай прэс-канферэнцыі пасля прыезду ў Польшчу яна падзякаваў уладам Японіі, Міністэрству замежных спраў Польшчы, Канцылярыі прэмʼера і дыпламатычным службам за дапамогу.
«Калі я была ў Алімпійскай вёсцы, трэнер і людзі з нашай каманды падышлі да мяне і загадалі сказаць, што я атрымала траўму і хачу дадому, у іншым выпадку, у мяне могуць узнікнуць праблемы ў Беларусі», – сказала Ціманоўская. Яна дадала, што пазней пачула, што шанцаў на яе выступ на дыстанцыі 200 метраў няма, паведамляе Rzeczpospolita.
аз