Наш карэспандэнт звязаўся з удзельнікам паседжання, экспертам iSANS Belarus Сержам Харытонавым.
Беларускае пытанне разгледжана на паседжанні Хельсінскай камісіі ЗША з удзелам прадстаўнікоў Кангрэсу і амерыканскага ўраду. І цяпер яны атрымалі дадатковую інфармацыю для прыняцця рашэнняў, што рабіць далей з рэжымам Лукашэнкі.
Беларускі эксперт міжнароднай ініцыятывы iSANS (https://isans.org/) Серж Харытонаў даў вусныя і пісьмовыя паказанні на паседжанні і падаў экспертныя рэкамендацыі па мінімізацыі наступстваў дзейнасці дзяржаўных медыя Беларусі і іх дарадцаў з РФ.
Вось што расказаў для Польскага радыё Харытонаў, яшчэ знаходзячыся ў цягніку з Вашынгтона ў Нью-Ёрк:
-Чальцы камісіі атрымалі рэкамендацыі заблакаваць усе акаўнты гэтак званых дзяржаўных медыяў з Беларусі і Расіі на амерыканскіх лічбавых пляцоўках – перш за ўсё, гаворка пра YouTube. Сярод іншага, падчас сустрэчы было зазначана, што Злучаныя Штаты павінны разглядзець магчымасць абмеркавання беларускага пытання з саюзнікамі ЗША на Бліжнім Усходзе, якія дагэтуль падтрымліваюць кантакты з беларускімі ўладамі.
Падчас паседжання былы намеснік дзяржсакратара ЗША па пытаннях дэмакратыі, правоў чалавека і працы Дэвід Крэмер прапанаваў формулу вырашэння беларускага пытання для петракратыяў Бліжняга Усходу: гандаль са Злучанымі Штатамі альбо гандаль з рэжымам у Мінску.
Улічваючы, што частка фінансавых актываў рэжыму меркавана захоўваецца ў ААЭ вырашэнне гэтага пытання будзе сур’ёзным аргументам у працэсе пашырэння эканамічнага ціску на мінскі рэжым.
Спецыяльна для Беларускай службы Польскага радыё, Казімір Шчадковіч, Мінск-Вашынгтон.