Сайт Onet.pl публікуе меркаванне ўкраінскага журналіста і актора Яўгена Дзьячкова (Eugeniusz Diaczkow) наконт удзелу расіянкі ў конкурсе прыгажосці «Міс Сусвет».
Конкурс «Міс Сусвет» прайшоў у Новым Арлеане, ЗША. За званне самай прыгожай жанчыны змагаліся прэтэндэнткі больш чым з 80 краін. Тытул «Міс Сусвет» атрымала РʼБоні Габрыэль з ЗША. Другое месца заняла Аманда Дудамель з Венесуэлы, трэцяе – Андрэіна Марцінес з Дамініканскай Рэспублікі. Польшчу на міжнародным конкурсе прыгажосці прадстаўляла Аляксандра Клепачка, якая, аднак, не здолела трапіць у топ-16.
Шмат спрэчак выклікала прысутнасць на конкурсе «Міс Сусвет» расіянкі Ганны Ліннікавай, якая зʼявілася ў касцюме імператрыцы. На ёй была залацістая сукенка, упрыгожаная каштоўнымі камянямі, паверх якой быў апрануты крывава-чырвоны аксамітны плашч. На галаве была карона, якая сімвалізуе расійскую імперыю.
Ва ўмовах уварвання Расіі ва Украіну многія каментатары палічылі гэта непаразуменнем, назваўшы Ганну Ліннікаву «міс генацыд».
«Бомбы пастаянна лётаюць, і свет дазваляе быць у цэнтры ўвагі жанчыне, чыя вопратка ўслаўляе монстра, машыну для забойства людзей», – мяркуе ўкраінскі журналіст Яўген Дзьячкоў.
Журналіст хацеў бы спытаць у арганізатараў конкурсу, чаму яны дазволілі выступіць расіянцы, ды яшчэ і ў касцюме, які сімвалізуе моц Расіі.
«Няўжо шоу цяпер мае большае значэнне, чым этычны і маральны падыход да сітуацыі? Чаму ніхто, НІХТО не пытаўся ў яе пра вайну?! Яны баяцца?» – задаецца рытарычным пытаннем Дзьячкоў.
вх