Спікер Сейма Шыман Галоўня прапануе забараніць карыстанне мабільнымі тэлефонамі ў польскіх школах. Большасць палякаў «за» — паведамляе Rzeczpospolita.
Газета нагадвае, што апазіцыйныя палітыкі (ПіС, Канфедэрацыя і Разам) імкнуцца ўвесці забарону на тэлефоны ў школах. Тэму смартфонаў у перадвыбарчай кампаніі ўздымае і маршал Шыман Галоўня, які патрабуе ўвесці забарону на іх выкарыстанне ў навучальных установах.
Rzeczpospolita спытала ў палякаў пра іх погляды. 37,8% апытаных заявілі, што яны цалкам згодныя з забаронай тэлефонаў у школах, а 21,8% сказалі, што яны хутчэй з гэтым згодныя. 27,7% прытрымліваюцца супрацьлеглага меркавання. Прыкладна кожны дзясяты не меў меркавання на гэты конт.
Ідэю Шымана Галоўні часцей падтрымліваюць выбаршчыкі апазіцыі (75 працэнтаў), чым выбаршчыкі кіруючай кааліцыі (60 працэнтаў). Мужчыны часцей выступаюць за такое рашэнне, чым жанчыны. Чым вышэйшы ўзрост рэспандэнтаў, тым большая колькасць тых, хто кажа «не» смартфонам у школе.
Найбольш праціўнікаў сярод людзей ва ўзросце 70+ (79 працэнтаў). Аднак маладыя рэспандэнты ва ўзросце ад 18 да 29 гадоў маюць іншы падыход да гэтага пытання. Сярод іх 13 адсоткаў падтрымліваюць забарону смартфонаў у школах, а больш за 66% супраць яе. Кожны пяты рэспандэнт не мае меркавання на гэты конт.
Бацькі таксама падтрымліваюць забарону смартфонаў у школах. У выпадку адзіных дзяцей больш за палову апытаных падтрымліваюць гэтую ідэю. Калі дзяцей двое ці больш, 47 працэнтаў выказваюцца «за».
Дыскусіі аб забароне тэлефонаў у школах вядуцца па ўсёй Еўропе. У некалькіх краінах, такіх як Францыя, Нідэрланды і Фінляндыя, такая забарона будзе дзейнічаць з верасня гэтага года, нагадвае газета.
IBRiS правёў даследаванне 17-18 красавіка з выкарыстаннем метаду CATI на выбарцы з 1069 чалавек.
нг