Сулашова знаходзіцца прыкладна ў 29 км на паўночны захад ад Кракава. Яна не раз трапляла ў навіны. Гэта з-за фотаздымкаў, якія паказваюць вёску з вышыні птушынага палёту.
Здымкі дэманструюць складаную мазаіку з зялёных і залатых палёў, а таксама групу дамоў з рознакаляровымі дахамі. Праз вёску праходзіць толькі адна дарога, адна з самых доўгіх у Польшчы - 9 км. У вёсцы пражывае каля шасці тысяч чалавек і ўсе яны жывуць уздоўж гэтай жа адной дарогі.
Гэтая ўнікальная карціна прывяла брытанцаў у захапленне.
Сулашова не раз трапляла на старонкі газет — гэтым разам пра вёску напісала брытанскае выданне Daily Mail. У вёсцы ў апошнія гады назіраецца рост турызму.
«Раней людзям было лягчэй жыць на адной вуліцы», — патлумачыла такое размяшчэнне ў размове з журналістамі «Super Express» Катажына Бега з Рады гміны Сулашова. Яна дадала, што з вышыні птушынага палёту гэтая ўнікальная кампазіцыя трохі нагадвае ліст.
Сюды пачалі прыязджаць турысты пасля таго, як у інтэрнэце трапілі фота і відэа вёскі. Убачыць маляўнічыя палі сваімі вачыма хочуць многія.
Вёска была заснавана ў 16 стагоддзі арыстакратычным вайскоўцам. Калісьці ціхая і невядомая, сёння набывае вядомасць яшчэ і дзякуючы таму, што яе называюць «малой Тасканай».
яс