ЗША будуюць новы «самалёт суднага дня» - піша Onet. У ім няма вокнаў для пасажыраў, ён можа заставацца ў паветры да тыдня і нават здольны перажыць выбух атамнай бомбы або падзенне астэроіда на Зямлю. Гэта адны з самых захапляльных лятальных апаратаў, якія можна ўбачыць у небе сёння. Такі самалёт заўсёды суправаджае паездкі амерыканскага прэзідэнта ў якасці своеасаблівага страхавога поліса і неўзабаве атрымае сваю апошнюю версію.
Ідэя «самалётаў суднага дня» з'явілася падчас прэзідэнцтва Рональда Рэйгана ў 1980-х гадах, калі напружанасць паміж ЗША і Савецкім Саюзам была настолькі высокай, што перспектыва Трэцяй сусветнай вайны здавалася цалкам рэальнай. Варта адзначыць, што гэта не баявыя машыны, а лятаючыя цэнтры сувязі або нават лятаючыя радыеактыўныя бункеры. Яны былі сканструяваныя, каб перажыць ядзерны напад СССР на Злучаныя Штаты, а ў выпадку разбурэння наземных камандных цэнтраў — дазволіць паветрана-дэсантным уладам ЗША аддаваць загады вайскоўцам (у тым ліку праводзіць атаку ў адказ) або грамадзянскім службам і каардынаваць дзеянні ўрада.
Каб падрыхтаваць машыны да такога тыпу падзей, яны абсталяваны шырокім спектрам абарончых мер. Сёння гэтыя незвычайныя версіі Боінгаў могуць пахваліцца сапраўды вялікімі магчымасцямі. Паводле афіцыйнай інфармацыі ВПС ЗША, самалёты неадчувальныя да электрамагнітных імпульсаў, яны таксама маюць спецыяльную абарону ад уздзеяння ядзерных выбухаў і надзвычай высокіх тэмператур, і нават выкарыстоўваюць аналагавыя прыборы, што робіць іх устойлівымі да кібератак. У іх самыя сучасныя сістэмы абароны ад прамых атак і магчымасць лётаць да тыдня (з дазапраўкай у палёце). А характэрнай асаблівасцю з'яўляецца тое, што ў самалёце... няма вокнаў.
У цяперашні час на актыўнай службе застаюцца чатыры такія самалёты, адзін з якіх заўсёды знаходзіцца ў стане павышанай гатоўнасці, каб самалёт быў гатовы ў любы момант да патэнцыйнага крызісу ў Злучаных Штатах. На прыклад, калі стала вядома, што прэзідэнт Дональд Трамп заразіўся каранавірусам, у паветры ўжо былі два «самалёты суднага дня» — на ўсялякі выпадак.
На борце, акрамя экіпажа і спецыяльнага персаналу, якія выступаюць у якасці дарадцаў тым, хто кіруе пэўнай крызіснай сітуацыяй з самалёта, ёсць таксама шмат электроннага абсталявання, якое выкарыстоўваецца для сувязі і маніторынгу сітуацыі на зямлі, у тым ліку тэлефоны з прамой сувяззю з найважнейшымі ўстановамі і людзьмі ў краіне. У якасці «самалётаў суднага дня» выступаюць Boeing E-4B і Boeing E-6 Mercury з фюзеляжам без вокнаў. Гэтыя апошнія маюць магчымасць дыстанцыйна запускаць ядзерныя балістычныя ракеты, якія знаходзяцца ў арсенале ЗША. Машыны з'яўляюцца апошняй лініяй абароны амерыканскай арміі, калі б была страчана магчымасць запускаць балістычныя ракеты з каманднага цэнтра на зямлі.
нг