Рэцэпт з кнігі «Як гатаваць. Практычны падручнік па кулінарыі» Марыі Дыслёвай, 1931 год.
Багацце рэцэптаў мазуркаў у кулінарных кнігах першай паловы XX стагоддзя сапраўды неверагоднае. Гэты рэцэпт асаблівы, бо цеста робіцца не з пшанічнай мукі ці молатых міндаляў, як у традыцыйных мазуркаў, а з крухмалу, праслоенае ружавым варэннем і зверху пакрытае міндальнай пенай. Выпечка арыгінальная, простая і вельмі смачная.
Аснова
6 жаўткоў
1 бялок
100 г цукру
100 г крухмалу
Верх
125 г молатага міндалю
125 г цукру
1,5 бялка
цэдра і сок з паловы лімона
варэнне з пялёсткаў ружаў для праслойкі
Прыгатуйце аснову мазуркі – жаўткі ўзбіце з цукрам на пышную, крэмападобную масу. Бялок узбіце ў пену.
У крухмал дадайце ўзбітыя жаўткі, добра перамяшайце. Напрыканцы асцярожна дадайце бялковую пену.
Форму для выпечкі засцяліце пергаментам, пералажыце масу ў форму. Разагрэйце духоўку да 180 градусаў. Калі нагрэецца, пастаўце цеста і выпякайце 20 хвілін. Астудзіце.
На астуджаным нізе раўнамерна пашмаруйце ружавае варэнне.Затым бялкі ўзбіце з цукрам. У пену дадайце молаты міндаль, лімонны сок і цэдру. Акуратна перамяшайце. Раўнамерна размяркуйце пену па варэнні. Зноў пастаўце ў духоўку, разагрэтую да 150 градусаў. Выпякайце 12 хвілін. Зверху можаце ўпрыгожыць рознымі ўзорамі.
Смачна есці!
Падрабязней пра тое, як прыгатаваць страву, раскажуць Кацярына Адамская і Валеры Саўко.
слухайце аўдыёфайл