Даследчыкі Ягелонскага ўніверсітэту ў Кракаве пацвярджаюць, што рух дапамагае псіхічнаму здароўю. Дастаткова адной сесіі аэробных практыкаванняў, каб людзі былі больш чуллівымі на пазітыўныя, а не на негатыўныя стымулы. Гэта дзейнічае ў тым ліку і на хворых на дэпрэсію. Інстытут псіхалогіі Ягелонскага ўніверсітэту правёў даследаванні, якія пацвярджаюць гэта.
Асобы, якія ўзялі ўдзел у эксперыменце спачатку запаўнялі анкету наконт іх эмоцый, затым палову гадзіны ехалі на стацыянарным ровары і зноў запаўнялі анкету пра свае эмоцыі.
З удзельнікамі даследавання працаваў Томаш Лікэнза.
- Мы даследавалі, якім чынам на рух рэагуюць здаровыя людзі і асобы з дэпрэсіяй, назіралі ці фізічныя практыкаванні выклікаюць змену настрою і рэакцыю на эмацыйныя стымулы.
Удзельнікаў даследавання падключалі пад апарат ЭЭГ электраэнцэфалограф, які фіксуе актыўнасць электрычных імпульсаў у мозгу.
- Пацыент на камп'ютары глядзіць карцінкі, якія выклікаюць моцныя эмоцыі, напрыклад, выяву маленькага дзіцяці, здымак трагічнага ДТЗ, або ранення.
Пасля паўгадзіны язды на ровары ўдзельнік эксперыменту зноў глядзеў карцінкі і запаўняў анкету пра эмоцыі.
Томаш Лікэнза падводзіць вынікі.
- Назіраецца пэўнае паляпшэнне настрою і змена рэакцыі на стымулы, то бок, эмацыйнай рэактыўнасці мозга. Хачу адзначыць, што ў здаровых людзей змены былі відавочныя. Пасля фізічных практыкаванняў мозг рэагуе мацней на станоўчыя эмоцыі, чым на негатыўныя.
У выніку эксперыменту ў Ягелонскім універсітэце было пацверджана, што дастаткова адной сесіі фізічных практыкаванняў, каб мозг чалавека актыўна адрэагаваў на станоўчыя стымулы. Людзі з дэпрэсіяй пасля практыкаванняў таксама казалі, што настрой у іх палепшыўся.