Віцэ-прэм’ер і міністр лічбавых тэхналогій Кшыштаф Гаўкоўскі не бачыць шанцаў на працяг ініцыяванай папярэдняй урадавай камандай правых сілаў праграмы «Ноўтбук для вучня». У замен ён плануе, між іншым, паскорыць працу над Нацыянальнай сістэмай кібербяспекі, паведамляе Puls Biznesu.
У інтэрв'ю згаданаму выданню міністр Гаўкоўскі паведаміў, што ў першым квартале бягучага года міністэрства пачне грамадскія кансультацыі па Нацыянальнай сістэме кібербяспекі.
«У Еўропе многія краіны ўжо ўвялі ахоўныя меры. У Польшчы мы будзем прапаноўваць падобныя рашэнні», – заявіў ён.
Палітыка таксама спыталі пра праграму забеспячэння вучняў чацвёртага класа ноўтбукамі.
«Я быў аптымістам. Я лічыў, што калі папярэдні ўрад запэўніваў, што сродкі з еўрапейскага Нацыянальнага плана аднаўлення і грошы ў бюджэце на гэтую мэту ёсць, то гэта праўда. Між тым, мы атрымалі інфармацыю з Еўракамісіі, што выдаткі на ноўтбукі не бяруцца пад увагу. Папярэдні ўрад таксама не загарантаваў у бюджэце сродкаў на гэтую мэту», – сказаў віцэ-прэм’ер.
«Я не бачу шанцаў захаваць праграму ў цяперашнім выглядзе», – дадаў палітык і запэўніў, што разам з міністрам адукацыі Барбарай Навацкай зробяць усё, каб праграма забеспячэння вучняў ноўтбукамі дзейнічала ў будучыні.
«Зараз я не буду працягваць яе любой цаной», – сказаў Кшыштаф Гаўкоўскі ў размове з выданнем Puls Biznesu.
Нагадаем, міністр адукацыі Барбара Навацка паведаміла, што ў чацвер разам з міністрам лічбавых тэхналогій афіцыйна паведамяць пра планы адносна праграмы «Ноўтбук для вучня».
Яна таксама адзначыла, што «ёсць сурʼёзныя заўвагі Еўракамісіі па гэтай праграме, яе мэтавасці і абароны моладзі ад кіберпагроз». Паводле яе, «ноўтбукі раздаваліся без канкрэтных адукацыйных мэтаў».
Згодна з праграмай «Ноўтбук для вучня», пачынаючы з 2023/2024 навучальнага года чарговыя вучні чацвёртых класаў дзяржаўных і прыватных базавых школаў у Польшчы павінны былі атрымліваць бясплатна ноўтбукі. Першыя ноўтбукі, якія школьнікі атрымалі ў верасні 2023 года, былі набытыя са сродкаў дзяржаўнага Польскага фонду развіцця.
аз