„Рукі прэч ад Беларусі!”, - напісаў у блогу „Эхо Москвы” лідар расійскай апазіцыйнай партыі „Яблоко” Рыгор Яўлінскі. Палітык падкрэслівае, што „ўмяшанне Расіі ў падзеі ў Беларусі будзе злачынствам”.
Іншы расейскі апазіцыйны актывіст Дзмітрый Гудкоў не верыць, што Уладзімір Пуцін вырашыць накіраваць расійскія войскі ў суседнюю краіну.
- Расейцы не падтрымаюць інтэрвенцыю, і прапаганда ў гэтым выпадку не дапаможа. Цяжка будзе растлумачыць расейцам, чаму Расія накіроўвае войскі ў Беларусь.
Апазіцыйны палітолаг Леанід Гозман адзначае, што ўмяшанне Расіі ў суседнюю краіну было б страшным для самой Расіі. „Калі б, не дай Бог, да гэтага дайшло, нас там будуць вітаць як агрэсара. Яны будуць страляць па нашых салдатах”, - папярэджвае расійскі эксперт.
На думку палітолага Уладзіміра Пастухова, Расія прыме найбольш зручнае для яе рашэнне. „Калі Крэмль зразумее, што перамога рэвалюцыі непазбежная, то ён не будзе супраць гісторыі”, - разважае расійскі палітолаг.
„Пуцін нікуды нічога не ўвядзе”, - супакойвае ў сваю чаргу гісторык Марк Саланін і дадае, што ў Расіі няма неабходных сіл для правядзення такой аперацыі.
Нагадваем, учора Уладзімір Пуцін і прэзідэнт Беларусі Аляксандр Лукашэнка размаўлялі пра магчымую ваенную дапамогу ў вырашэнні сітуацыі ў Беларусі.
аз