Раней з іскам да ведамства на $310 тыс. звярнуўся адзін з расійскіх трымальнікаў папер, піша РБК.
Міністэрства фінансаў Беларусі паведаміла, што разгледзець спрэчку па еўрааблігацыях краіны можна ў судзе Мінска ці нават Лондана, як таго патрабуе першапачатковая эмісійная дакументацыя, па якой былі выпушчаны каштоўныя паперы.
«Тэхнічна і з пункту гледжання права такі разгляд магчымы, нягледзячы на тое, што Вялікабрытанія ўвяла санкцыі ў дачыненні і Беларусі, і Расіі», падкрэсліў прадстаўнік Мінфіна на пасяджэнні ў Масгарсудзе, дзе папярэдне разглядаюцца прэтэнзіі расійскага прыватнага інвестара да Мінфіна Беларусі.
Інвестар падаў пазоў у сувязі з тым, што праз санкцыі выплаты па бондах перасталі даходзіць да расійскіх трымальнікаў папер.
«Расійскія суды такую спрэчку разглядаць не могуць», заключыў прадстаўнік Мінфіна і хадайнічаў аб спыненні разгляду справы ў Масгарсудзе. Таксама ў цэлым ён выказаў нязгоду з патрабаваннямі пазоўніка.
Прэтэнзіі прыватнага інвестара Аляксандра Марчанкава датычацца двух выпускаў еўрааблігацый Беларусі з пагашэннем у 2030 і 2031 годзе. Пазоўнік патрабуе ад Мінфіна Беларусі датэрмінова пагасіць набытыя ім аблігацыі, бо міжнароднае агенцтва Moody's прызнала дэфолт па дзярждоўгу краіны.
Прадстаўнік Мінфіна нагадаў, што Беларусь не адмаўлялася ад выплат. У адпаведнасці з унутранай пастановай, яны робяцца на спецыяльны рахунак у Беларусбанку. Расійскія інвестары могуць атрымаць гэтыя грошы, падаўшы ў Мінфін дакументы, якія пацвярджаюць валоданне каштоўнымі паперамі, і адкрыўшы рахунак у банку.
Але такія выплаты практычна не ажыццяўляюцца, распавёў РБК прыватны інвестар Сяргей Сазонаў, які таксама зʼяўляецца трымальнікам беларускіх еўрабондаў і прысутнічаў на пасяджэнні.
Па словах Сазонава, у яго ёсць такі рахунак, але ў выплатах на яго Мінфін адмовіў.
«Выплаты грашовых сродкаў трымальнікам еўрааблігацый не будуць адноўленыя да завяршэння ўсіх унутрыдзяржаўных працэдур па ўнясенні змяненняў у сумесную пастанову ўрада і Нацыянальнага банка Беларусі», – гаворыцца ў адказе беларускага Мінфіна на зварот Сазонава (копія дакумента ёсць у РБК).
Інвестару вядома, што некалькім трымальнікам бондаў, якія адкрылі рахункі, усё ж удалося атрымаць частку выплат да снежня 2022 года, пасля гэтага ўсе пералічэнні былі спыненыя.
яс/Наша Ніва