Мясцовыя ўлады паведамілі пра загінулага чалавека. У жылым доме ўзнік пажар. «Усе выратавальныя каманды працуюць ва ўзмоцненым рэжыме», – напісаў мэр Адэсы Генадзь Труханаў у Telegram. Паводле папярэдніх дадзеных, горад быў атакаваны блізу 20 беспілотнікамі.
Агулам Расія падчас чарговага масіраванага нападу па гарадах Украіны запусціла больш за 300 ударных дронаў і больш за 30 ракет розных тыпаў, паведаміў прэзідэнт Украіны Уладзімір Зяленскі.
Паводле інфармацыі Зяленскага, у выніку атакі ворага пацярпелі Данецкая, Кіраваградская, Дняпроўская, Сумская, Херсонская, Валынская, Запарожская, Мікалаеўская, Адэская, Жытомірская вобласці.
У выніку атакі ёсць ахвяры і параненыя.
Таксама сёння Аператыўнае камандаванне Узброеных сіл Польшчы паведаміла пра падвышэнне боегатоўнасці ваенна-паветраных сілаў з-за атакі Расіі на Украіну.
«У адпаведнасці з дзеючымі працэдурамі Аператыўнае камандаванне Ваенна-паветраных сіл Польшчы разгарнула ўсе даступныя сілы і сродкі, падняло ў паветра чарговыя пары знішчальнікаў, а наземныя сродкі супрацьпаветранай абароны і радыёлакацыйнай разведкі былі прыведзены ў найвышэйшую гатоўнасць».
Прынятыя меры накіраваны на падтрыманне бяспекі ў раёнах, якія мяжуюць з зонамі, што знаходзяцца пад пагрозай знішчэння.
IAR/вх